Tungufellskirkja

Kirkja hefur staðið í Tungufelli frá ómunatíð en fyrst er vitað um kirkju þar skömmu eftir árið 1200.  Hún var þá helguð Andrési postula.  Hún var útkirkja frá Reykjadalsprestakalli en frá árinu 1819 hefur hún heyrt undir Hruna.  Kirkjan í Tungufelli hefur alla tíð verið bændakirkja eða allt til ársins 1987 að eigendur gáfu hana Þjóðminjasafninu.  Guðsþjónusta er tvisvar á ári  að sumarlagi og á Gamlársdag.

Kirkja sú sem nú stendur var byggð árið 1856 og var forsmiður hennar Sigfús snikkari Guðmundsson frá Ytri-Tjörnum í Eyjafirði.  Hún er timburkirkja, upprunalega bikuð.  1903 var kirkjan klædd járni að nokkrum hluta og seinna að fullu og öllu.  Gólfflötur kirkunnar er 22 fermetrar og tekur hún um 30 manns í sæti.  Að innan er hún þiljuð með spjaldaþili en í kórnum er hvelfing yfir og er hún undir áhrifum frá Dómkirkjunni í Reykjavík. Hvelfing kirkjunnar er með elstu slíkum hvelfingum í timburkirkjum á Íslandi.

Í Tungufellskirkju er predikunarstóll og altari ásamt ramma utan um altaristöflu, allt útskorið og málað af Ófeigi Jónssyni frá Heiðarbæ í Þingvallasveit. Þessir gripir voru upphaflega smíðaðir inn í eldri torfkirkju sem stóð í Tungufelli og var byggð af Ófeigi sjálfum árið 1831 en viður kirkjunnar hafði verið mjög lélegur þó hann hafi verið sagður nýr kjörviður.  Árið 1948 var verulega farið að sjá á kirkjunni og annað hvort varð að gera á henni gagngerar viðgerðir eða byggja nýja.

(Heimild: Kirkjur Íslands; Reykjavík 2001; Hið íslenska bókmenntafélag)

• Altaristaflan

• Predikunarstóllinn

• Sálmataflan

• Gamla altaristaflan

• Tungufellskrossinn

• Kirkjuklukkurnar